Ngjela:”Nëse sistemi është i barabartë, atëhere është OK”
Propozimi i Partisë Socialiste për ndryshimin e sistemit zgjedhor ka sjellë nevojën për të bërë disa ndryshime në Kushtetutë. Deputeti Spartak Ngjela i sheh këto ndryshime si të nevojshme nëse merret parasysh fakti se është vetë ndryshimi i sistemit elektoral i cili e sjell një kërkesë të tillë. “ Ndryshimet e Kushtetutës janë të domosdoshme nëse ndryshon sistemi. Këta duan të ndërrojnë sistemin elektoral. Duan të kthejnë nga mazhoritar në proporcional zonal dhe patjetër që duhet të ndryshojë edhe ligji” shprehet Ngjela për “Korrierin”. Sipas tij, do të ishte zgjidhje e mirë edhe mundësia që në Kushtetutë ti jepet vetëm karakteri i përgjithshëm sistemit, pra duke e përcaktuar vetëm si sistem proporcional. Ndërsa përsa i përket llojit të proporcionalit, ai shprehet se këtë mund ta zgjidhte kodi zgjedhor. Ngjela mbështet kështu idenë e hedhur një ditë më parë nga kreu i PSD-së Gjinushi, i cili u ka propozuar partive të mëdha një opsion zgjidhje për sistemin e ri zgjedhor, duke kërkuar që të hiqet përcaktimi i termave kombëtar, rajonal apo zonal. Ndërkohë, ndërsa pritet që në fund të muajit Mars ose në javën e parë të muajit Maj të bëhet zyrtarizimi i partisë së re të themeluar nga Ngjela, ai shprehet se tashmë kjo e fundit është strukturuar mirë, duke u shtrirë në të gjithë Shqipërinë. I pyetur nëse e sheh si të përshtatshëm ndryshimin e sistemit zgjedhor përsa i përket partisë së tij të re, ai shprehet se nëse sistemi do të jetë i barabartë për të gjithë, atëhere ai nuk paraqet asnjë problem.
K.Kuçaj Korrieri